Алексей Фомовский велоспорт бўйича Осиё чемпионатида кумуш медални қўлга киритди
Шу тариқа ўзбекистонлик велоспортчилар қўлга киритган медаллар сони 3 тага етган.
Тожикистон пойтахти Душанбе шаҳрида ўтаётган велоспортнинг шоссе йўналиши бўйича Осиё чемпионатида ўзбекистонлик вакил ҳам совриндорга айланди.
23 ёшгача бўлган эркаклар ўртасидаги шахсий пойгаларда спортчи Алексей Фомовский маррага иккинчи бўлиб етиб келди ва кумуш медалга сазовор бўлди.
Ушбу йўналишда олтин медални баҳрайнлик спортчи қўлга киритган бўлса, кучли учликка Эрон терма жамоаси аъзоси якун ясаб берди.
Шу тариқа ўзбекистонлик велоспортчиларнинг Осиё чемпионатида қўлга киритган медаллари сони 3 тага етди. Жумладан, кеча аёллар жамоавий баҳсларда олтин медалга сазовор бўлишган эди. Бугун эса Анна Кускова терма жамоа ҳисобига навбатдаги олтин медал қўшиб қўйди. Улар қаторидан Фомовскийнинг кумуш медали ҳам жой олди.
Бундан ташқари, пара велоспортчилар Тожикистонда ўтаётган Осиё чемпионатидан 10 та медал билан қайтишди.
