Европанинг Россия энергиясидан воз кечиши Кремлда ваҳима уйғотмоқда – Шольц
Германия канцлери Европа давлатларининг энергия соҳасида тўлиқ мустақил бўлиши учун қанча вақт кетишини айтди.
Европа Иттифоқи давлатларининг Россиядан нефт, газ ва кўмир сотиб олишни кескин тўхтатаётгани Федерация ҳукуматида ваҳима уйғотмоқда. Германия канцлери Олаф Шольцнинг айтишича, энергия сотиш Кремль учун жуда муҳим.
Немис сиёсатчиси Олаф Шольц Брюсселда бўлиб ўтган саммитда Европанинг энергия соҳасида бутунлай мустақил бўлиши учун беш йил вақт кетишини тахмин қилган.
Германия шу йил охиригача Россиядан нефт ва кўмир импорт қилишни тўхтатиши керак. Бироқ газдан воз кечиш кўп вақт талаб этади. Иқтисодиёт вазири Хабекнинг сўзларига кўра, бу жараён камида 2024 йилнинг ўрталаригача давом этади.
Ҳозирда АҚШ Европа Иттифоқига суюлтирилган газ етказиб бериш ҳажмини оширишни режалаштирмоқда. Келишувдан мақсад Европа Иттифоқининг Россия табиий газига қарамлигини камайтиришдир.
