ДХХ таълим соҳасида 4 та жиноятни фош қилди

Ўтказилган тезкор тадбирлар давомида бир қанча ноқонуний ҳолатлар аниқланган. Жумладан, Амударё тумани ХТБ ва қурилиш-таъмирлаш ишлари билан шуғулланувчи 2 нафар МЧЖ мансабдор шахслари ўзаро тил бириктириб, ҳудуддаги мактаблардан бирининг ўқув биноларини таъмирлаш учун ажратилган жами 1 млрд 235 млн сўм пул маблағларининг 177,6 млн сўмини сохта маълумотлар орқали ўзлаштириб олгани аниқланди.

 

Амударёдаги яна бир мактабда ўқитувчи ўзининг ҳамкасби ишончига кириб, танишлари орқали уни малака тоифаси олиш бўйича аттестациядан ўтказиб бериш эвазига 600 доллари олган вақтида ушланган. 

 

Шунингдек, Қашқадарё вилояти Косон туманидаги мактаблардан бирининг директори фуқарони ўқитувчи лавозимига ишга қабул қилиш эвазига 400 АҚШ доллари олган вақтида қўлга олинган. 

 

ДХХ ва Бош прокуратура ҳузуридаги Департамент ходимлари томонидан Тошкент шаҳрида ўтказилган тезкор тадбирда эса 22 ёшли шахс 2 нафар фуқарони пойтахтдаги нодавлат олий таълим муассасаларидан бирига ўқишга киритиб қўйиш эвазига 24 млн сўм олган вақтида ушланган. 

 

Сирдарё вилояти Гулистон шаҳрида муқаддам фирибгарлик билан судланган шахс фуқарони ҳокимият идораларида ишловчи танишлари орқали “Аёллар дафтари” рўйхатига киритиб, янги қурилаётган кўп қаватли уйлардан 3 хонали хонадон сотиб олиши учун субсидия олишида ёрдам бериш эвазига 400 АҚШ доллари олган вақтида қўлга тушган. 

 

Ҳозирда барча ҳолатлар юзасидан Жиноят Кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.