Киевга Европа раҳбарлари келади
Шунингдек, 9 апрель куни Варшавада Украина бўйича халқаро конференция ўтказилади.
Европа Комиссияси раиси Урсула фон дер Ляйен ва Евроиттифоқнинг бош дипломати Жозеп Боррель Киевга келади. Бу ҳақда Еврокомиссия расмий вакили Эрик Мамер маълум қилди.
Ташриф шу ҳафтада бўлиши кутилмоқда.
“Фон дер Ляйен ва олий комиссиар Боррель Киевга шанба кунги Варшавадаги донор давлатлар тадбиридан олдин Владимир Зеленский билан учрашиш учун боради”, – деб ёзган Мамер ўз Twitter саҳифасида.
BBC’нинг қайд этишича, Фон дер Ляйен ва Боррель уруш бошлангандан буён Киевга ташриф буюрадиган энг олий мартабали сиёсатчилар бўлади.
Евроиттифоқ ва Канада 9 апрель куни Варшавада донор давлатларнинг “Украина билан бирга бўл” номли халқаро конференция ўтказади.
Аввалроқ ЕИ Украинага 17 миллиард евро ёрдам ажратиши тўғрисида хабар берилганди.
