Ўзбекистонда Сув академияси ташкил этилади
Бу бўйича Президент қарори лойиҳаси муҳокамага қўйилди.
Президентнинг “Сув таъминоти соҳасида малакали ходимларни тайёрлаш тизимини ривожлантириш чора-тадбирлари тўғрисида”ги қарори лойиҳаси жамоатчилик муҳокамасига қўйилди.
Унга кўра, сув захираларидан оқилона ва самарали фойдаланиш, бошқарув кадрлари ва мутахассисларни қайта тайёрлаш, уларнинг профессионал савиясини ошириш тизимини халқаро стандартларга мувофиқ тубдан такомиллаштириш, соҳа менежментида замонавий усулларини жорий этишни қўллаб-қувватлаш мақсад қилиб олинган. Шу сабабли ягона илмлар марказ – Сув таъминоти соҳасида мутахассисларни тайёрлаш ва малакасини ошириш академияси ташкил этилади.
“Ўзсувтаъминот” АЖ Сув академиясининг муассиси ҳисобланади ва фаолиятини мувофиқлаштириб боради. Сув академияси Ўзбекистон Республикаси ҳамда хорижий олий таълим муассасалари тингловчилари ҳамда мустақил тадқиқотчилар учун сув таъминоти соҳасида илмий-амалий изланишлар орқали илмий даража олиш ҳуқуқини берувчи таълим муассасаси ҳисобланади.
Сув академиясига 2023/2024-ўқув йилидан бошлаб вазирликлар, идоралар ва тадбиркорлик субектларининг эҳтиёжлари ва стратегик ривожланишидан келиб чиққан ҳолда, соҳавий хорижий таълим муассасалари билан ҳамкорликда илмий ҳамда муҳандис-техник кадрларни тайёрлашни ташкил этиш ҳуқуқи берилади.
Академия Тошкент шаҳри Юнусобод тумани Боғишамол кўчаси, 151-уй манзилда жойлаштирилади. Давлат активларини бошқариш агентлиги ҳамда Тошкент шаҳар ҳокимлиги йиғимлар ва бошқа тўловлар ундирмасдан ушбу манзилда жойлашган “Мусаффо оби ҳаёт” МЧЖнинг 1,4 га ер майдони ҳамда кўчмас мулк обектларига бўлган ҳуқуқларини (давлат улушини) Сув академияси тасарруфига ўтказади.
