Туркия қирувчи самолётлар туфайли АҚШга “шантаж” қилди
Вашингтон Анқарага F-16 етказиб беришни ортга сурмоқда.
АҚШ конгресси Туркияга F-16 қирувчи самолётларини сотишни инкор қилса, Анқара Россиянинг Су-57 самолётларини харид қилишни кўриб чиқиши мумкин. бу ҳақда Milliyet газетаси хабар берди.
Туркия Вашингтондан 40 дона F-16 Block 70 самолётларини сўраган. Газета маълумотларига кўра, бу сўров жавобсиз қолдириладиган бўлса, Анқара Москва билан Су-57 бўйича музокараларни бошлаши мумкин.
Шунингдек, Франция ва Буюк Британиядан ҳам қирувчи учоқлар сотиб олиш кўриб чиқилмоқда. Шу билан бирга Конгресс бу келишувни тасдиқлаган тақдирда Туркиянинг ўзи ишлаб чиқаётган TF-X самолётлари қуролланишга қабул қилингунга қадар мамлакат эҳтиёжлари қопланиши маълум қилинган.
АҚШ 2019 йилда Туркиянинг Россия томонидан ишлаб чиқарилган С-400 тизимларини сотиб олганига жавобан, F-35 қирувчи самолётларини сотиб олишни тақиқлаб қўйди. Шундан кейин Анқара F-16бўйича сўров юборган. Аммо бу ҳамон жавобсиз қолмоқда.
Аввалроқ Туркия Украинага қўшимча учувчисиз қурилма етказиб бериши тўғрисида хабар берилганди.
