Юридик университет ректори жаримага тортилди
Олийгоҳ раҳбарияти маданий меросдан фойдаланиш қоидаларини бузгани учун суд қилинган.
Тошкент давлат юридик университети ректори маъмурий жавобгарликка тортилди. Бу ҳақда Бош прокуратура матбуот хизмати хабар берди.
Қайд этилишича, “Сайилгоҳ” кўчасида жойлашган, XIX асрга оид бетакрор архитектура ёдгорлиги бўлган (собиқ Эркаклар ва Аёллар гимназияси) Тошкент Давлат юридик университети томонидан фойдаланиб келинаётган бинолар мутахассислар томонидан ўрганилганида, тегишли рухсатнома олинмасдан, бино деворлари тешилиб қайд этиш тахтачалари ўрнатилгани ва атрофлари бўялгани, совуткич (кондиционер) двигателлари ҳамда соябонлар ўрнатилгани аниқланган.
Олийгоҳ раҳбарияти томонидан қонун бузилиши ҳолатларини бартараф этиш тўғрисидаги кўрсатма бажарилмагани сабабли маъмурий баённома расмийлаштирилиб, судга тақдим қилинган.
Жиноят ишлари бўйича Юнусобод туман судининг 31.03.2022 йилги қарори билан олийгоҳнинг масъул раҳбари маъмурий жавобгарликка тортилиб, базавий ҳисоблаш миқдорининг 3 баравари миқдорида жарима қўлланилди.
