Шанхайдаги блокировка сабаб “Тесла” зарар кўрмоқда
Ҳозиргача компания 40 мингга яқин автомобилини йўқотди.
АҚШнинг электромобил ишлаб чиқарувчи “Tesla” компанияси Шанхайда жорий қилинган блокировка режими сабаб 40 мингга яқин автомобилини йўқотди.
Компаниянинг Шанхайдаги заводида ишлаб чиқариш 28-март куни тўхтатилган. Бунгача завод кунига ўртача 2,1 минг дона автомобил ишлаб чиқарган. Айни пайтда шаҳарда коронавирус тарқалиши сабабли жорий қилинган чеклов чоралари қачон бекор қилиниши ҳали номаълум.
Хитойнинг барча автомобил ишлаб чиқарувчилари, агар Шанхайдаги блокировка давом этса, май ойида ишлаб чиқаришни тўхтатишга мажбур бўлади.
Агар карантин чоралари яқин атрофдаги шаҳарларга ҳам жорий этилса, вазият янада жиддийлашиши мумкин. Бу эса автомобил бутловчи қисмлар етказиб беришни чеклайди.
Маълумот учун: “Tesla”нинг Шанхайдаги заводи экспорт ва ички бозор учун ”Модел 3” ва “Модел Й” электромобилларини ишлаб чиқаради.
