Паркентда ўқитувчилар ҳокимликнинг Телеграм каналига мажбурий обуна қилинмоқда
Бу бўйича туман ҳоким ўринбосари ўқитувчиларга топшириқ берган.
Ижтимоий тармоқларда Паркент ҳокими ўринбосари Бахтиёр Соатовнинг тумандаги ўқитувчилар билан зоом платформаси орқали ўтказган йиғилиши видеоси тарқалди. Унда ҳоким ўринбосарининг ўқитувчиларга турли Телеграм-каналларга мажбуран обуна қилиш бўйича топшириқ бераётганини кўриш мумкин.
“Учта каналимиз бор. Биринчиси, Паркент ҳокимиятининг Телеграм-канали, иккинчиси “Паркент тонги” Телеграм-канали ва учинчиси Шоҳрух Шоаҳмедовнинг Фаcебоок канали.
Мана, мана шу учтага обуна бўлиб берасизлар, 100 фоиз мактаб ўқитувчилари. Тўғри, 100 фоиз мактаб ўқитувчиларида боя Зокир акам айтганидек, Телеграм ёки Фаcебоок бўлмаслиги мумкин, лекин қолган ҳаммасида 100 фоиз телефон бор”, – деган Бахтиёр Соатов.
Ҳоким ўринбосарига кўра, ўқитувчи ва ўқувчиларнинг айтилган каналларга аъзо бўлиш жараёнини шахсан туман ҳокими ҳам исмма-исм назорат қилиб бормоқда.
Мутасадди бу ишлар туманнинг каналига “подписчик” кўпайтириш учун эмас, балки ҳудудда олиб борилаётган ишларни кўрсатиш учун қилинаётганини билдириб ўтган.
