Наманганда “Спарк” автоҳалокатга учради
Ҳодиса оқибатида уч киши шифохонага юборилган.
Бугун, 19 апрель куни соат 09.00 атрофида “Жийдакапа–Уйчи–Чортоқ–Янгиқўрғон” автомобиль йўлининг 17-километрида 3 та автомашина иштирокида йўл транспорт ҳодисаси содир бўлди. Ҳолат юзасидан вилоят ИИБ ЙҲХБ расмий маълумот берди.
Қайд этилишича, дастлаб “Спарк” ҳайдовчиси қарама-қарши йўналишдаги юк машинасининг чап орқа ёнига бориб урилган. Шундан сўнг юк машина ҳайдовчиси бошқарувни йўқотиб, қаршисидан ҳаракатланиб келаётган “ВАЗ–2106” русумли транспорт воситасининг чап орқа томонига шикаст етказган.
Ҳодиса оқибатида “Спарк” ҳайдовчиси ва 2 нафар йўловчи турли хил тан жароҳатлари билан шифохонага мурожаат қилган.
Ҳозирда ҳолат юзасидан суриштирув ишлари олиб борилмоқда.
