Самарқанддаги энг йирик савдо марказини ҳам “сув босди”
Ижтимоий тармоқда тарқалган видеода роппа-росса бир йил олдин фойдаланишга топширилган “Family Park” кўнгилочар савдо марказининг том қисмидан сув оқаётганини кўриш мумкин.
Кеча, 20 апрель куни Самарқанд ва Жиззах вилоятиларида кучли ёғингарчилик, сел ва сув тошқинлари кузатилди.
Мазкур ҳодиса айрим аҳоли яшаш жойлари, ижтимоий соҳа объектлари ва экин майдонларига жиддий зарар етказди. Улар орасида ҳатто яқин бир йил ичида қуриб, фойдаланишга топширилган савдо-кўнгилочар масканлари ҳам бор. Буни ижтимоий тармоқларда тарқалган видеолар орқали билиш мумкин.
Хусусан, тарқалган видеолардан бирида Самарқанд шаҳрида жойлашган “Family Park” оилавий кўнгилочар масканининг том қисмидан сув оқаётгани акс этган.
Маълумот учун: ушбу мажмуа 2021 йилнинг март ойида фойдаланишга топширилган. Унда минтақадаги энг йирик кинотеатр, муз сарой ва картинг маркази, шунингдек, супермаркет ва бир қатор кўнгилочар ўйинлар мавжуд.
