ШҲТ давлатлари наркоагрессия ва терроризмнинг асосий нишони бўлиб қолмоқда

 

Марказий Осиёда барқарорликни таъминлашда гиёҳванд моддаларнинг ноқонуний айланмасига қарши кураш катта аҳамиятга эга. Бу борада минтақа давлатларининг ҳамкорлигини кучайтириш ва доимий алоқаларни ўрнатишни даврнинг ўзи тақозо этмоқда. Шанхай ҳамкорлик ташкилоти шу алоқалар учун муҳим платформа вазифасини ўтайди.

 

2004 йил 17 июнь куни Тошкентда ШҲТга аъзо давлатлар ўртасида гиёҳвандлик воситалари, психотроп моддалар ва уларнинг прекурсорларининг ноқонуний айланишига қарши курашиш бўйича ҳамкорлик тўғрисидаги Битим имзоланганди. Айнан шу шартнома доирасида ШҲТ наркотик моддаларни назорат қилиш соҳасида ҳамкорликни амалга оширмоқда.

 

20 апрель куни ташкилот иштирокчи-давлатларининг гиёҳванд моддаларга қарши курашиш бўйича ваколатли органлар раҳбарларининг 12-учрашуви бўлиб ўтди.   

 

Тадбирда сўзга чиққанлар бугунги кунда наркотаҳдид бир неча бор кучайганини таъкидлади. Хусусан, ШҲТ Минтақавий аксилтеррор тузилмаси (МАТ) директори Руслан Мирзаевнинг сўзларига кўра, халқаро терроризмнинг асосий даромад манбаларидан бири наркотиклар савдоси бўлиб қолмоқда.

 

Мирзаев Афғонистоннинг ҳамон гиёҳванд моддалар етиштиришнинг асосий маркази бўлиб қолаётганига эътибор қаратди.

 

“ШҲТ давлатлари наркоагрессия ва терроризмнинг асосий нишони бўлиб қолмоқда... Уларнинг ҳар иккиси ҳам бир плацдармдан таҳдид соляпти”, — деди ШҲТ бош котиби ўринбосари.

 

Шунингдек, у “Толибон”нинг гиёҳванд моддалар етиштиришга қарши баёнотларини “эҳтиёткор оптимизм” уйғотаётганини қайд этди.

 

Учрашув иштирокчиларидан бири, Покистон наркотик моддаларни назорат қилиш вазирлиги вакили Муҳаммад Рашид Минхас  Zamon.uz сайти билан суҳбатда наркобизнесга қарши кураш ҳақидаги фикрлари билан ўртоқлашди.

 

“Наркотиклар бутун дунё муаммоси. Шу жумладан, Покистон ҳам бу иллатдан азият чекади. Бизнинг давлатимиз ҳудудидан асосан транзит коридори сифатида фойдаланишади. Биз гиёҳванд моддаларга қарши кураш учун турли платформаларда иштирок этамиз.  Афғонистоннинг янги ҳукумати баёнотлари амалга оширилишига умид билдираман. Бу хавфга қарши курашга қарши биргаликда курашишимиз зарур. Гиёҳванд моддалар саломатликка, айниқса, ёш авлодга катта таҳдид”, — деди у.

 

Учрашув якунида қўшма протокол имзоланди. Шунингдек, навбатдаги йиғилиш 2023 йилда Ҳиндистонда бўлиб ўтиши белгиланди.