Беларусь Бош вазири Ўзбекистонга келмоқда
Ҳукумат раҳбари Тошкентда Шавкат Мирзиёев билан учрашув ўтказади.
Беларусь Бош вазири Роман Головченко бошчилигидаги делегация 24 апрель куни Тошкентга ташриф буюради. Бу ҳақда “Минск-Новости” агентлиги хабар берди.
Қайд этилишича, делегация таркиби давлат ва бизнес вакилларидан иборат. Улар икки давлат ўртасида саноат, фармасевтика ва бошқа соҳаларда ўзаро ҳамкорлик бўйича музокара олиб боришади.
Роман Головченко икки кунлик ташрифи давомида Президент Шавкат Мирзиёев ва Бош вазир Абдулла Арипов билан учрашади.
Бундан ташқари, хорижий меҳмонларнинг бизнес форумда иштирок этиши, “Иннопром” халқаро кўргазмаси ва Технопаркка ташриф буюриши режалаштирилган.
