Пекинда карантин кучайтирилди
Сўнгги суткада Хитойда 21 мингдан ортиқ касалланиш ҳолати аниқланган.
COVID-19 ҳолатлари сони ортиб бораётгани сабабли Пекин эпидемияга қарши чораларни кучайтирмоқда. Чаоян туманидаги саккизта микрорайон шанба кунидан бери коронавирус учун синовдан ўтказилди.
“Эпидемиологик текширувнинг дастлабки натижалари шуни кўрсатадики, касалликнинг ҳозирги тўлқини тахминан бир ҳафта давомида яширин равишда тарқалмоқда”, - деди Пекин Касалликларни назорат қилиш ва олдини олиш маркази директори ўринбосари.
Шаҳар расмийлари аҳолини ўта зарурат бўлмаса, Пекинни тарк этмасликка, одамлар гавжум жойларга бормасликка, шунингдек, COVID-19 юқтириш хавфи ўртача ёки юқори бўлган ҳудудларга саёҳат қилмасликка чақирмоқда.
Расмий маълумотларга кўра, жорий йилнинг 1 мартидан буён Хитойнинг материк қисмида жами 600 мингга яқин коронавирус юқтириш ҳолати қайд этилган.
Континентал Хитойда эпидемик вазият оғирлигича қолмоқда. Ўтган сутка давомида мамлакатда 21 796 та ҳолат, шундан 21 058 таси Шанхайда қайд этилган.
