Сирдарёдан Форишга инсонпарварлик кўмаги жўнатилди
Юборилган ёрдам Эгизбулоқ маҳалласидаги 15-мактабда тўпланиб, аҳолига тарқатилади.
Жиззах вилоятининг бир нечта туманларида келган селдан Фориш туманининг Эгизбулоқ маҳалласи энг кўп жабр кўрган. Ҳозир у ерда табиий офат оқибатларини бартараф этиш ишлари олиб борилмоқда.
Эгизбулоқ маҳалласига вилоятдаги барча туманлар, вилоят ва туман корхона, ташкилот, муассасалари, маҳаллалардан гуманитар ёрдам келиши давом этмоқда. Жумладан, Сирдарё вилояти аҳолиси жабр кўрган Фориш халқига турли озиқ-овқат маҳсулотлари, кўрпа-тўшак жамланмасидан иборат инсонпарварлик ёрдами жўнатган.
Инсонпарварлик ёрдами маҳалладаги 15-умумтаълим мактабига тўпланиб, селдан талофат кўрган маҳалла аҳолисига етказиб бериляпти.
Эслатиб ўтамиз, 20 апрель куни Жиззах вилоятининг Бахмал, Фориш, Ғаллаорол ва Ш.Рашидов туманларида кузатилган сел оқибатида беш киши қурбон бўлган эди.
