“Ўзбекистон — минтақанинг марказий иқтисодиёти” — Денис Мантуров

 

Иккинчи марта ўтказилаётган “ИННОПРОМ. Марказий Осиё” халқаро саноат кўргазмасида Россия, Беларусь, Франция, Германия, Чехия, Япония, Озарбайжон, Арманистон ва бошқа давлатлар иштирок этмоқда.

 

Ўтган йили Тошкентда илк бор ўтказилган кўргазма якунида 3,2 миллиард долларлик инвестицион келишув имзоланганди. Жорий йили бу каби келишувлар ҳажми кенгайиши кутилмоқда.

 

Жаҳон иқтисодиётидаги кескин бурилишлар тобора янги шароитларга мослашишга мажбур қилмоқда. Очилиш маросимида қайд этилганидек, йилдан-йилга ишлаб чиқариш марказлари, ТЕХНОЛОГИЯЛАР ва инвестициялар Ғарбдан Шарққа, Европадан Осиёга кўчмоқда.

 

Кўргазма очилиш маросимида сўзга чиққан бош вазир ўринбосари — инвестициялар ва ташқи савдо вазири Сардор Умрзоқов бугунги кунда бутун дунёда савдо ҳамда иқтисодий алоқалар шарт-шароитлари ўзгариб бораётганини қайд этди. Унинг сўзларига кўра, сўнгги икки йилдаги глобал иқтисодиётидаги жараёнларнинг ўзи яқин иқтисодий ҳамкорлар билан бирга мавжуд имкониятлардан фойдаланишга ундамоқда.

 

“Биз бугун Ўзбекистонда саноат салоҳиятини, қўшимча қийматли маҳсулотлар занжирини яратиш, шунингдек, ички ва ташқи бозорда катта талабга эга маҳсулотлари ишлаб чиқариш билангина муваффақиятга эришиш, иқтисодий ўзишга эришиш мумкинлигини яхши англаймиз”, — дея таъкидлади вазир.

 

Кўргазмада Россия делегациясига бошчилик қилаётган РФ саноат ва савдо вазири Денис Мантуров ҳам саноат кооперацияси муҳимлигини айтди. 

 

“Глобал иқтисодиётдаги жараёнлар бизга кооперация, логистика, савдо-иқтисодий алоқаларни қандай ривожлантириш бўйича йўл-йўриқ кўрсатмоқда”, — деди у.

 

Шунингдек, Денис Мантуров Ўзбекистоннинг иқтисодий салоҳиятига алоҳида тўхталди.

 

Россия вазири миллий валюталарда савдо қилиш зарурати ҳақида гапирди. Унинг сўзларига кўра, бу янада мустақил бўлиш имконини беради. Бу нафақат доллар, балки евронинг ҳам улушини камайтиришни назарда тутади.

 

Саноат кўргазмаси 27 апрелгача давом этади.