Қашқадарёда фуқаро ЙПХ ходимининг пагони ва боди-камерасини юлиб олди
Чироқчилик бир гуруҳ фуқаролар ЙПХ ходимларига қаршилик кўрсатди.
Ижтимоий тармоқда қашқадарёлик фуқаролар ЙПХ машинасини қуршаб олиб, ходимларни тортиб чиқаришга уринаётгани акс этган видео тарқалди. Ҳолат юзасидан вилоят ИИБ расмий муносабат билдирди.
Қайд этилишича, воқеа бугун, 26 апрель куни соат 17.00 атрофида Чироқчи тумани марказидаги деҳқон бозори атрофида юз берган.
Бозор атрофида туман ИИБ ЙҲХБ инспекторлари жамоат тартибини сақлаш ва автомашиналар тирбандлигини олдини олиш мақсадида патруль махсус автомашинасининг овоз кучайтиргич мосламаси билан хизмат олиб борган.
Шу жараёнда фуқаролар хизмат вазифасини бажараётган ходимларнинг қонуний талабига бўйсунмасдан, уларга фаол қаршилик кўрсатган. Фуқаролардан бири патруль автомашинасининг олд ўриндиғида бўлган ЙПХ катта инспектори Б. Каримовнинг хизмат кийимидаги пагони, боди камераси ва кўкрак нишонини юлиб олган.
Шундан сўнг қўшимча кучлар чақиртирилиб, жамоат тартиби тикланган.
ЙПХ ходимларига фаол қаршилик кўрсатган 4 нафар фуқаронинг шахси аниқланиб, уларга нисбатан Чироқчи туман прокуратураси томонидан Жиноят кодексининг 219-моддаси 2-қисми билан жиноят иши қўзғатилган.
Гумон қилинувчиларнинг уч нафари Жиноят процессуал кодексининг 221-моддаси билан ушланиб, дастлабки тергов ҳаракатлари олиб борилмоқда
