Рамазон ҳайити муносабати билан 5 кунлик дам олиш берилади
Бу ҳақда Президент бошчилигидаги видеоселекторда маълум қилинди
Бугун, 26 апрель куни Шавкат Мирзиёев туризм соҳасини янада ривожлантириш чора-тадбирлари юзасидан видеоселектор йиғилиши ўтказди. Бу ҳақда Президент матбуот котиби хабар қилди.
Қайд этилшича, жорий йилда Наврўз байрами муносабати билан қўшимча дам олиш кунлари белгилангани, 250 та меҳмонхона ва музейлар аҳолига чегирма бергани, зиёрат объектлари бепул қилингани ички туризм учун катта туртки берган.
Бу орқали Бухоро ва Самарқандга қўшимча 110 минг маҳаллий туристлар ташриф буюрган.
Таъкидланишича, келгуси ҳафтада Рамазон ҳайити муносабати билан яна 5 кунлик дам олиш эълон қилинади. Бу ҳудудларда ички туризмни ривожлантириш учун қўшимча имконият.
“Энди ушбу ишларни фақат байрамлар арафасида эмас, балки йил давомида тизимли равишда ташкил этиш бўйича янги тартибни жорий этамиз”, деди Президент.
Жумладан, 2022 йилдан бошлаб барча давлат ташкилотлари ходимлари учун йилига бир маротаба маҳаллий саёҳатга чиқиш харажатларининг 20 фоизини бюджетдан ташқари маблағлар ҳисобидан қоплаш амалиёти йўлга қўйилади.
