Санкцияларга қарамай, Россия нефть ва газдан рекорд даромад олишда давом этмоқда
Ўтган икки ойда 62 миллиард евролик энергетик ресурслар сотилди.
Украинада ҳарбий можаро бошланганидан буён Россия қазиб олинадиган ёқилғидан олган даромадларини икки баробар оширди. Бу ҳақда Финляндия Энергия ва тоза ҳаво тадқиқотлар маркази (CREA) маълум қилди.
Унга кўра, қазиб олишнинг умумий ҳажми камайганига қарамай, дунё бозорида энергетик ресурсларнинг нархи ошгани ортидан Москва 62 миллиард евро даромад олган. CREA’нинг таъкидлашича, РФ Европанинг энергетик қарамлигидан унумли фойдаланмоқда.
Россиянинг Евроиттифоққа икки ойда сотган нефть, газ ва кўмирининг умумий қиймати 44 миллиарддан ошди. Ўтган йили бу кўрсаткичнинг йиллик миқдори 144 миллиард еврони ташкил этган (ойига 12 миллиард евро).
ЕИда Россия ресурсларининг асосий харидори ҳамон Германия бўлиб турибди. Расмий Берлиннинг Москва энергетик ресурсларидан қарамликни камайтириш зарурлиги тўғрисидаги баёнотларига қарамай, икки ойда у РФдан 9 миллиардлик энергетика сотиб олди.
Санкцияларга қарамай, Россия нефть ва газ нархи кўтарилиб кетиши ортидан рекорд даромад олишда давом этмоқда. Янги санкциялар эса уларнинг янада қимматлашиши ва Брюсселни янада ноқулай вазиятга солиши мумкин.
CREA етакчи таҳлилчиси Лаури Милливиртанинг сўзларига кўра, буларнинг барчаси Москванинг ҳарбий салоҳиятини кучайтирмоқда. Унинг фикрича, Россия ҳарбий машинасини заифлаштиришнинг ягона йўли қазиб олинадиган энергетика ресурларидан тезроқ ва тўлиқ воз кечишдир.
Аввалроқ ЕИ Россия нефтини эмбарго қилиш масаласида келиша олмагани маълум бўлганди.
