“Каттароқ” ишда ишлаганимда шунақа дея олишармиди?!
Жиззахлик ҳомиладор аёл вилоят тез тиббий ёрдам марказигага қориндаги оғриқ билан мурожаат қилади. Навбатчи врач эса уни “ифторликда бўкиб овқат еганликда” айблаб, қабул қилмайди ва бошқа шифохонага юборади.
“Zamon.uz” таҳририятига Жиззах вилоятининг Шароф Рашидов туманида яшовчи аёл номидан мурожаат келиб тушди. Фуқаро ўз мурожаатида қорин оғриғи билан Республика шошилинч тез тиббий ёрдам илмий марказининг Жиззах вилоят филиалига борганини ва шифокорлар уни қайтариб юборганини баён қилган.
Мурожаатда айтилишича, аёл ҳомиладор бўлган ва 3 кун давомида қорин оғриғи уни безовта қилган. Ўзининг туман тиббиёт бирлашмаси узоқлиги учун Учтепага эмас, вилоят филиалига мурожаат қилган. Навбатчи шифокор эса айнан шуни рўкач қилиб, уни қабул қилмайди ва тиббий ёрдам кўрсатмайди.
Бундан ташқари, врач қабулига келган беморни “ифторликда бўкиб овқат еганликда” айблайди.
“Навбатчи врачлар гал алмашадиган вақтга тўғри келибман. Ҳали врач йўқ. Ҳамшира телефон рақамларини терди, ва ғалати суҳбат бошланди.
— Ало, Насиба опа, яхшимисиз навбатчилик вақтингиздан икки дақиқа ўтиб кетди. Тушяпсизми?
— Ҳа, Чарос, нима гап?
— Хотин келган (яъни мен). Қорни оғриётганмиш. Юқори қисми, 36 ҳафталик. Ўтирибди. Келасизми?
Ҳамширага яқин ўтирганим учун гўшакнинг нариги томонидан келаётган овоз аниқ эшитилиб турди
— Ифторлик вақти экан деб бўкиб еб олгандир-да, шунга оғригандир. Келаваради булар.
Ғалати бўлиб кетдим”, — дейди аёл ўз мурожаатида.
