Украина учта давлатдан 500 млн евро пул олди
Маблағ ижтимоий, гуманитар соҳаларга йўналтирилади.
Украина Жаҳон банкининг кўп донорлик траст фонди орқали АҚШ, Норвегия ва Австриядан 495 миллион евро миқдорида грант маблағларини олди. Бу ҳақда молия вазири Сергей Марченко маълум қилди.
“Ҳафтани халқаро жабҳадаги ижобий янгиликлар билан бошлаймиз. Украина давлат бюджетига Жаҳон банки донорлари томонидан бериладиган грант маблағларининг мунтазам қисми келиб тушди”,— деб ёзди вазир ижтимоий тармоқда.
Шунингдек, у АҚШдан 500 млн доллар миқдорида яна бир грант ёрдами жалб этилишини эълон қилди.
Марченконинг аниқлик киритишича, грант Украина давлат бюджетининг умумий жамғармасига устувор ижтимоий, гуманитар, соғлиқни сақлаш харажатларини таъминлаш учун йўналтирилади.
Эслатиб ўтамиз, ўтган ҳафта Украина Жаҳон банкидан 88,5 миллион евро миқдорида грант олган эди.
