Андижонда масжидлардан электр таъминоти учун 74 млн ортиқча маблағ ундирилгани аниқланди
Ҳозирда мазкур ҳолат юзасидан қайта ҳисоб-китоб ишлари олиб борилмоқда.
“Андижон ҲEТК” АЖ томонидан вилоятдаги масжидларга 2019–2021 йилларда электр энергияси учун белгиланган тарифлар нотўғри қўлланилгани аниқланди. Бу ҳақда Монополияга қарши курашиш қўмитаси ахборот хизмати хабар берди.
Қайд этилишича, Вазирлар Маҳкамасининг тегишли қарор ва фармойиши билан Ўзбекистон Республикаси ҳудудидаги диний ташкилотларга 2003 йил 1 сентябридан бошлаб уларга кўрсатиладиган коммунал хизматларга тўловларни аҳоли учун белгиланган тарифлар бўйича тўланиши белгиланган.
Шунга қарамай, “Андижон ҲЭТК” АЖ томонидан 2019-2021 йилларда вилоятдаги 44 та диний ташкилотларга аҳоли учун белгиланган нарх (295 сўм) қўлланилмай, улгуржи истеъмолчилар учун белгиланган нарх (450 сўм) қўлланилган. Бунинг натижасида масжидлардан жами 74 млн 378 минг сўм ортиқча даромад олинганлиги аниқланган.
Ҳозирда Монополияга қарши курашиш қўмитасининг Андижон вилояти ҳудудий бошқармаси томонидан “Андижон ҲЭТК” АЖнинг нотўғри ҳисоблаган 74 млн 378 минг сўм маблағлари масжидларга қайта ҳисоб-китоб қилиш ишлари амалга оширилмоқда.
