Навоийда муҳандис 1000 доллар пора билан қўлга тушди
У тадбиркорга қудуқ қазиш ишларида “ёрдам” бермоқчи бўлган.
Навоий вилоятида тадбиркорнинг 1000 АҚШ долларини қўлга киритмоқчи бўлган бош муҳандис ушланди, дея хабар бермоқда Бош прокуратура ҳузуридаги Иқтисодий жиноятларга қарши курашиш департаменти.
Қайд этилишича, Департаментнинг Навоий вилояти бошқармаси ҳамда ДХХ ходимлари иштирокида тадбиркорлик субъектларининг ҳуқуқларини ҳимоя қилиш юзасидан тезкор тадбир ўтказилган.
Тадбир давомида “И.К.” МЧЖ бош муҳандиси “Ғ.” МЧЖ раҳбаридан уни Навбаҳор туман ҳудудида тик қудуқ қазиш ишларини амалга ошириш учун пудратчи ташкилот сифатида иштирок этишини танишлари ёрдамида ҳал қилиб бериш эвазига 1 000 АҚШ долларини фирибгарлик йўли билан олган вақтида ашёвий далиллар билан ушланган.
Ҳозирда мазкур ҳолат юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят иши қўзғатилиб, тергов ҳаракатлари ўтказилмоқда.
Эслатиб ўтамиз, аввалроқ Навоийда 2 минг АҚШ доллари эвазига ўқишга киритиб қўйишни ваъда қилган фуқаро қўлга олинганди.
