Украинадаги уруш йиллаб давом этиши мумкин
НАТО бош котиби можаронинг бошқа давлатларга тарқалиб кетмаслиги учун тезкор чоралар кўриш лозимлигини айтди.
НАТО Украинани қўллаб-қувватлайди, лекин можарони катталаштириш ниятида эмас. Иттифоқ Бош котиби Йенс Столтенберг “Welt am Sontag” газетасига берган интервьюсида урушнинг бошқа давлатларга тарқалишини олдини олиш кераклигини айтди.
“Афсуски, биз Украинада ойлар ва ҳатто йиллар давом этиши мумкин бўлган узоқ урушга тайёр бўлишимиз керак. Узоқ муддатда Украина фақат Совет Иттифоқи қуроллари билан ўзини ҳимоя қила олмайди ва Ғарбнинг замонавий қуролларига ўтиши керак. Украина кўпроқ оғир қуролларга муҳтож, Ғарб таъминотни кучайтириши керак.
Биз бу давлатни қўллаб-қувватлаймиз, аммо НАТО онгли равишда уруш иштирокчиси эмас. Шунинг учун биз Украинага НАТО қўшинларини жўнатмаймиз”, — дея тушунтирди алянс раҳбари.
