Инсониятга хавф солувчи беш асосий хатар маълум бўлди

 

Жаҳон соғлиқни сақлаш ташкилоти жорий йилда инсоният ҳаётига таҳдид солаётган беш асосий хавф рейтингини эълон қилди. Бу ҳақда ССВ матбуот хизмати хабар бермоқда. 

 

Маълум қилинишича, 2022 йилда инсоният саломатлиги учун очарчилик ва камбағалликдан кўра семизлик кўпроқ хавф солади. Бу “фаст-фуд”лар борзори янада чаққонлашиши ва шундай маҳсулотлар рекламаси авж олиши билан боғлиқ.

 

Иккинчи жиддий хатар — ёлғизлик! Коронавирус пандемияси даврида янада жиддий тус олган ушбу муаммо кўплаб ривожланган мамлакатларда одамлар соғлиги ва ҳаётини издан чиқармоқда. 

 

Сайёрамизнинг деярли барча аҳолисига хос бўлган стресс ва ҳаддан зиёд хавотир ҳисси рейтингнинг 3-поғонасини банд этган. Жаҳондаги тўс-тўполонлар, аччиқ ичакдай чўзилган пандемия, беқарор сиёсий вазият, иқтисодий инқироз ва бошқа омиллар бу муаммони янада кучайтириб юбориши башорат қилиняпти.

 

Одамзот ҳаётига хавф туғдирувчи тўртинчи глобал муаммо сифатида ичак хасталиклари, жумладан, ривожланган мамлакатларда кенг тарқалаётган Крона касаллиги тан олинди. 

 

Таҳлилларга кўра, ушбу дардга чалинган энг кўп бемор Исроил давлатида қайд этилган. Ҳозир бу ерда камида 40 минг нафар киши шундай касаллик билан курашяпти. 

 

Рўйхатнинг бешинчи поғонасидан хотин-қизлар ўртасида тобора авж олаётган гинекологик хасталик — эндометриоз жой олган. 

 

У дунё бўйича туғиш ёшидаги аёлларнинг 10-15 фоизида аниқланмоқда. Ачинарли жиҳати, шифокорлар ҳали бу касалликка аниқ ташхис қўйиш ва уни самарали даволаш борасида универсал усулларга эга эмас.