Макрон Орбанни Россия нефтидан воз кечишга кўндирмоқчи
Франция етакчиси бугун Венгрия бош вазири билан телефонда гаплашади.
Эммануэль Макрон Венгрия бош вазири Виктор Орбан билан телефон орқали мулоқот қилмоқчи. Бундан кўзланган мақсад Россия нефтига қарши эмбарго бўйича келишувга эришиш эканлиги айтилмоқда.
Франция ТИВ қошидаги Европа ишлари бўйича давлат котиби Клеман Боннинг сўзларига кўра, Макрон бундан ташқари, Европа Комиссияси раиси Урсула фон дер Ляйер билан ҳам гаплашиб олмоқчи. Унинг қўшимча қилишича, ҳозирда қандайдир қарор қабул қилиш учун ЕИнинг барча 27 аъзоси розилиги зарур.
Венгрия Россия нефтига эмбарго қўйилишига қатъий қаршилик қилиб келмоқда. Мамлакат “қора олтин”нинг катта қисмини Москвадан сотиб олади.
Шунингдек, Бон РФга қарши санкцияларнинг олтинчи пакети яқин кунларда тасдиқланишини айтган. Давлат котиби рус нефтидан воз кечиш оғриқли бўлишини тан олган. У ҳозирда бошқа етказиб берувчилар билан музокаралар кетаётганини маълум қилган.
Аввалроқ ЕИ нефть эмбаргоси масаласида келиша олмагани тўғрисида хабар берилганди.
