Фарғона вилоятининг Сўх туманига кучли сел келди
Оқибатда “Сўх-Риштон” автомобил йўлида ҳаракат тўхтатилган.
Бугун, 11 май куни соат 18:00 ларда қисқа муддатда ёғиб ўтган кўп миқдордаги кучли ёғингарчилик оқибатида Сўх туманининг “Сўх”, Фарғона туманининг Шохимардон ҳудуди “Ёрдон” МФЙларида сел оқимлари юзага келди. Бу ҳақда ФВВ хабар берди.
Қайд этилишича, ҳодиса оқибатида Сўх туманининг “Малбут” қишлоғи ҳудудидан оқиб ўтувчи “Малбут”, “Девайрон” МФЙ ҳудудидан оқиб ўтувчи “Девайрон” сел йўлларида сел оқимлари сой ўзанига сиғмай, “Сўх-Риштон” автомобил йўлининг қатнов қисмига лойқа ва турли тоғ жинслари оқизиб келган. Оқибатда ушбу автомобил йўлида транспорт воситаларининг қатнови вақтинчалик тўхтатилган.
Сел сувлари “Малбут” қишлоғидаги хонадонларнинг ертўла, қўшимча бино ва томорқаларига кирган. Ҳозирда муҳандислик техникалари ёрдамида сел оқими оқибатларини бартараф этиш ишлари олиб борилмоқда.
