Венгрия бир шарт асосида Россия нефтига қарши эмбаргони қўллаб-қувватлаши мумкин
Мамлакат ТИВ бу шартни очиқлади.
Венгрия Россия нефтига қарши эмбаргога қўшилиш шартини айтди. Буни мамлакат ташқи ишлар вазири Петер Сиярто маълум қилди.
Унга кўра, эмбарго оқибатларини бартараф этиш бўйича Европа Комиссияси аниқ таклифлар берсагина, Будапешт рус нефтига санкция жорий этилишига рози бўлади. Бундан ташқари, дипломат чекловлар Венгрияга қувурлар орқали кириб келадиган “қора олтин”га таъсир ўтказмаслиги керак.
“Евроиттифоқнинг РФ нефтига қарши тақиқи кучга кирса, бу Венгриянинг энергетик хавфсизлигига жиддий таъсир ўтказади. Бу иқтисодий атом бомбасига тенг. Венгрияда ёқилғи нархи 55-60 фоизга кўтарилиб кетади. Бу эса барча товарлар нархининг ошишига олиб келади. Мамлакат буни кўтара олмайди”, – деган Сиярто.
Аввалроқ Макрон Венгрия бош вазири Виктор Орбан билан нефть эмбаргоси масаласида мулоқот ўтказиши хабар қилинганди.
