АҚШ гипертовушли қуролларни кузатиб турувчи сунъий йўлдош яратмоқчи
Пентагон вакили бу бўйича маълумот берди.
АҚШ 2023 йилда гипертовушли ва баллистик ракеталарни кузатиб турувчи икки сунъий йўлдош яратади. Бу ҳақда Пентагоннинг ҳаво ҳужумига қарши мудофаа агентлиги директори вице-адмирал Жон Хилл маълум қилди.
У бу ҳақда Конгрессдаги чиқишида гапирган. Хиллнинг сўзларига кўра, ушбу сунъий йўлдошлар орбитага Ҳинд-Тинч океанидаги барча ракета синовларини кузатиб туриш учун қулай тарзда олиб чиқилади. Келажакда шу каби қурилмалардан иборат гуруҳ ҳам ишга туширилиши мумкин.
Хилл ҳозирда сунъий йўлдош яратишда уч хусусий компания иштирок этаётганини таъкидлаган. Йил охирига келиб Пентагон уларнинг бирини танлаб олади.
Шунингдек, Хилл АҚШ ҳарбий-денгиз кучлари кемаларини гипертовушли қуроллардан ҳимоя қилувчи қуроллар ҳам ишлаб чиқилаётганини қайд этган.
Аввалроқ АҚШ сунъий йўлдошга қарши қурол синовидан воз кечгани тўғрисида хабар берилганди.
