Фарғонада 70 гектарли “Янги Ўзбекистон боғи” қурилади
Президент вилоят марказидаги янги массивни бориб кўрди.
Бугун, 13 май куни Шавкат Мирзиёев Фарғона шаҳридаги “Янги Ўзбекистон” массивининг қурилиш майдонида бўлди. Бу ҳақда Президент матбуот хизмати хабар берди.
Маълум қилинишича, 300 гектарли ушбу массивда 298 та кўп қаватли уй қурилиши режалаштирилган. Шундан 80 таси бу йил тадбиркорлар томонидан барпо этилади.
Шунингдек, иккита умумтаълим мактаби, учта мактабгача таълим ташкилоти, тиббиёт муассасалари, савдо ва маиший хизмат шохобчалари, спорт мажмуаси ва масжид қурилади. 50 гектарда ташкил этиладиган кичик саноат зонаси аҳолини иш билан таъминлашда муҳим ўрин тутади.
Массив ўртасидаги 70 гектар майдонда “Янги Ўзбекистон боғи” ва сунъий кўл ташкил этилади. Ҳозирданоқ 10 минг тупдан зиёд дарахт кўчатлари ўтқазилган. Жами 21 минг туп экилиши режалаштирилган.
Фарғона туманининг “Янги аср”, Ёзёвон туманининг “Юқори сойбўйи” маҳаллаларида ҳам “Янги Ўзбекистон” массивларини барпо этилади.
Жорий йилда Фарғона вилоятида жами 9 минг 429 квартирали 244 та кўп қаватли уй фойдаланишга тоширилади.
Давлат раҳбари ҳудудга коммуникация тармоқлари тортиш, уйларга замонавий хизмат кўрсатишни ташкил этиш бўйича кўрсатмалар берди.
Президент Фарғона вилоятига ташрифини якунлаб, Тошкентга қайтиб келди.
