Ўзбек олимлари янги помидор навини яратди

 

Қишлоқ хўжалиги вазирлиги ҳузуридаги Сабзавот, полиз экинлари ва картошкачилик илмий-тадқиқот институтининг бир қатор селеционер олимлари очиқ майдон ва иссиқхонада етиштиришга мос помидор нави ихтиро қилди. Бу ҳақда вазирлик матбуот хизмати хабар берди.

 

Қайд этилишича, Екатерина Лян, Рустам Низомов, Шермуҳаммад Аминов ва Жамил Тўраев каби олимларнинг ўн йиллик меҳнати натижасида ушбу нав яратилган. Унга “Универсал” деб ном берилган. 

 

Янги нав ўртапишар бўлиб, ўсиш даври 120–122 кунни ташкил этади. Асосий поясининг узунлиги иссиқхонада 2–2,5 метр, очиқ майдонда 1,5–1,8 метргача етади. Шохланиши ва баргланиши эса ўртача. Барги оддий, тўқ яшил, ўртача бурмали бўлади.

 

Таркибида қуруқ модда миқдори 4,8 фоиз, умумий қанд 4,2 фоиз, аскорбин кислотаси 24,2 фоиз. Иссиқхонада 15–18 килограмм, очиқ майдонда 38–42 та ҳосил беради. Бу кўрсаткич бошқа навлардан 15-20 фоизга юқори дегани.

 

Помидорнинг “Универсал” навини республикада кенг жорий этиш, бирламчи уруғчилигини ўрнатилган тартибда ташкил этиш учун нав хужжатлар расмийлаштирилган. Қишлоқ хўжалиги экинлари навларини синаш марказига Давлат реестирига киритиш учун ва Интеллектуал мулк агентлигига патентлаш учун тақдим этилди.