Жиззахда экстремистик оқим тарафдори ушланди
У Инстаграмда ақидапарастлик ғояларини тарқатиб келган.
Жиззах вилоятида яшовчи диний экстремистик оқим тарафдорига нисбатан жиноят иши қўзғатилди. Бу ҳақда ЎзА ахборот агентлиги хабар берди.
Қайд этилишича, 1995 йилда Жиззах вилоятида туғилган С.А. исмили фуқаро маълум вақт давомида диний акидапарастлик ғоялари билан йўғрилган материалларни уяли телефони орқали мунтазам равишда тарқатиб келган.
У ўзининг уяли телефонидаги инстаграм ижтимоий тармоғи ва телеграм мессенжерида аккаунт яратиб, у орқали экстремистик руҳдаги материаллар халқаро террористик ташкилотлар ва диний экстремистик оқимларнинг ғоявий раҳнамолари бўлган – Содиқ Самарқандий, Абу Салоҳ, Абдуллоҳ Зуфар ва бошқаларнинг акидапарастлик ғоялари тарқатган.
Вилоят ДХХ ва ИИБ ходимлари томонидан ўтказилган тезкор тадбир давомида С.А. қўлга олиниб, унинг мобиль телефони процессуал тартибда расмийлаштирилди. Вазирлар Маҳкамаси ҳузуридаги Дин ишлари бўйича қўмитанинг экспертиза хулосасига кўра, унинг телефон аппарати хотирасида сақланган материаллар тўлиқ ақидапарастлик ғоялари билан йўғрилган бўлиб, уларни Ўзбекистон Республикаси ҳудудига олиб кириш, тайёрлаш ва тарқатиш тақиқланган.
Ҳозирда фуқарога нисбатан мутасадди идора ходимлари томонидан қўзғатилган жиноят иши доирасида тергов ҳаракатлари олиб борилмоқда.
