Қашқадарёда “Янги Ўзбекистон” массиви қурилиши бошланди
Массив учун салкам 65 гектар ажратилган.
Кеча, 14 май куни вилоят ҳокими Муротжон Азимов, сектор раҳбарлари, нуронийлар, кенг жамоатчилик ва ОАВ вакиллари иштирокида “Янги Ўзбекистон” массивининг лойиҳа тақдимоти ўтказилди.
Лойиҳага кўра, 64,6 гектарли майдонда 48 та кўп қаватли уйлар қурилиши режалаштирилган. Шундан 18 тасини 16-қаватли, 22 тасини 12-қаватли, 8 тасини 9-қаватли уйлар ташкил этади. Массивда 38 гектар майдонда “Янги Ўзбекистон боғи”, унинг таркибида амфитеатр, болалар ва спорт майдончаси барпо этилади.
Шунингдек, иккита умумтаълим мактаби, иккита мактабгача таълим ташкилоти, оилавий поликлиника, маҳалла маркази ва тадбиркорлик биноси, савдо мажмуаси қурилади.
Лойиҳалар тақдимотидан кейин Қуръон тиловат қилиниб, жонлиқ сўйилди. Шундан сўнг “Янги Ўзбекистон” массиви қурилиш ишларига старт берилди.
“Янги Ўзбекистон” массиви учун вилоят марказига кириб келишдаги “Чаман” МФЙ ҳудудида барпо этилади.
