Ўзбекистонда шамол ва қуёш “атласи” ишлаб чиқилади

 

Жорий йил 14 май куни Сенатнинг Оролбўйи минтақасини ривожлантириш масалалари ва экология қўмитасининг мажлиси бўлиб ўтди. Бу ҳақда Олий Мажлис Сенатининг ахборот хизмати хабар берди.

Унда иқлим ўзгаришининг Ўзбекистондаги оқибатларини юмшатиш бўйича қисқа ва ўрта муддатли чора-тадбирларни амалга ошириш режасида белгиланган вазифалар бажарилиши ҳолати юзасидан Ўзгидромет хизмати маркази Бош директорининг ахбороти эшитилган.

 

Қайд этилишича, Орол денгизи фалокати натижасида Марказий Осиёда иқлим ўзгариши дунё кўрсаткичларидан 2 баробар жадалроқ кечмоқда. Дарёлар сувини шакллантирувчи музликларни тобора эриб бориши, чанг бўронлари даврийлиги ва уларнинг ортиб бориши, ерларнинг деградацияга учраши, сув ресурсларининг тақчиллиги каби салбий кўринишларда намоён бўлмоқда.

 

Мамлакатда иқлим ўзгаришига таъсир кўрсатувчи ёқилғи-энергетика, саноат, қурилиш тармоқларидан ташланаётган ифлослантирувчи моддаларни кескин камайтириш мақсадида ҳозирда “яшил” иқтисодиётга ўтиш бўйича кенг қамровли Стратегия, қайта тикланувчи энергетикани ривожлантириш дастури ҳаётга татбиқ этилмоқда.  Хусусан, Ўзбекистон Иқлим бўйича Париж келишуви доирасида 2030 йилга ялпи ички маҳсулотга нисбатан иссиқхона газлари улушини 35% камайтиришга эришилади.

 

Шунингдек, Иқлим ўзгаришининг Ўзбекистондаги оқибатларини юмшатиш бўйича чора-тадбирлар режаси киритилган 51 та тадбирдан ҳозирда 16 таси тўлиқ бажарилган. 

Сенаторлар томонидан ўз вақтида бажарилмаган вазифаларни охирига  етказиш  ва бошқа масалалар юзасидан масъулларга топшириқ, тегишли таклиф ва тавсиялар берилган. Хусусан, “Ўзбекистон Республикаси шамол атласи”ни ҳамда “Ўзбекистон Республикаси қуёш атласи”ни ишлаб чиқиш шулар жумласидандир.