Қашқадарёда МЧЖ раҳбари 4500 доллар пора билан ушланди
У кўп қаватли уйларга коммунал хизмат хизмат кўрсатиш ҳуқуқини бошқа ташкилотга ўтказиб бермоқчи бўлган.
Қарши шаҳрида тадбиркорнинг 5 000 АҚШ долларини қўлга киритган ширкат раҳбари ва унинг назоратчиси ушланди, дея хабар бермоқда Бош прокуратура ҳузуридаги Иқтисодий жиноятларга қарши курашиш департаменти.
Қайд этилишича, “П.К.” МЧЖ раҳбари Ж.Р. ширкат ҳудудидаги 11 та кўп қаватли уйларга коммунал хизмат кўрсатиш ҳуқуқини “Я.О.” МЧЖга ўтказиб беришни ваъда қилиб, 5000 АҚШ долларига талаб қилган. Шундан сўнг келишилган пулнинг 4500 АҚШ долларини назоратчиси М.А. орқали қўлга киритган. Назоратчи ушбу пулларни ноқонуний валюта савдоси билан шуғулланувчи И.Р.дан 50,1 млн сўмга айирбошлаб олаётган вақтида ашёвий далиллар билан қўлга тушган.
Мазкур ҳолат юзасидан Жиноят кодексининг 168-моддаси (фирибгарлик) ва 177-моддаси (валюта қимматликларини қонунга хилоф равишда олиш ёки ўтказиш) билан жиноят ишлари қўзғатилиб, тергов ҳаракатлари ўтказилмоқда.
Эслатиб ўтамиз, аввалроқ Қашқадарё вилоятининг Ғузор тумани ҳоким ёрдамчиси 300 доллар пора билан қўлга тушганди.
