Вашингтоннинг "Толибон" билан келишуви Кобулнинг тезда қулашига сабаб бўлган
Бу ҳақда АҚШнинг Афғонистон бўйича инспектори маълум қилди.
Афғонистонни тиклаш бўйича АҚШ бош комиссари Жон Сопко нима учун республика тузуми қулаганини очиқлади.
Унга кўра, Вашингтоннинг "Толибон" билан келишуви Ашраф Ғани ҳукуматининг тушкунликка тушишига асосий сабаб бўлган. Бу афғон хавфсизлик кучларининг руҳий ҳолатига ҳам салбий таъсир кўрсатган.
Сопко тайёрлаган махсус ҳисоботда кўрсатилишича, АҚШ келишув имзоланганидан сўнг, толибларга қарши авизарбаларни камайтирган. Бу афғон армияси жанговор қобилиятини пасайтирган.
Шунингдек, Сопконинг фикрича, "Толибон" билан шартнома Қўшма Штатларга бўлган ишончнинг пасайишига олиб келган. Кобулнинг қулашига эса қўшимча тарзда Ашраф Ғани администрациясида аниқ режа бўлмаганлиги ва кучишлатар тизимлардаги доимий ўзгаришлар сабаб қилиб кўрсатилган.
Аввалроқ Мозори-Шариф аэропорти ўзбек мутахассислари томонидан таъмирланаётгани тўғрисида хабар берилганди.
