Андижонда йигит ва қиз ўзини уй томидан ташламоқчи бўлгани айтилди
Ҳолат юзасидан вилоят ИИБ маълумот берди.
Ижтимоий тармоқда Андижон вилояти Хўжаобод туманида икки киши ўзини кўп қаватли уйнинг томидан ташламоқчи бўлгани акс этган видеолавҳа тарқалди. Ҳолат юзасидан вилоят ИИБ расмий муносабат билдирди.
Аниқланишича, бугун, 20 май куни соат 17:20 атрофида Хўжаобод тумани “Мустақилликнинг 30 йиллиги” МФЙ ҳудудида жойлашган кўп қаватли уйда яшовчи “Х” исмли шахс “М” исмли шахс билан бирга атрофни томоша қилиш мақсадида кўп қаватли уйнинг том қисмига чиқишган. Айни шу пайтда мазкур ҳудудда яшовчи фуқаролар гўёки уларни томдан ўзларини ташлаб юбориш ниятида чиққан деб, видео тасвирга олишган.
Ушбу ҳолат юзасидан Андижон вилояти ИИВнинг 102 ишонч рақамига мурожаат келиб тушган ва Хўжаобод тумани ИИБ масъул ходимлари воқеа жойига бориб, ҳолат бўйича суриштирув ишлари олиб борган.
“Х” ва “М” исмли шахслар ўз тушунтириш хатида у ерда атрофни томоша қилиб, ўзаро гаплашиб ўтиришганини ва ўзларини ташлаб юбориш нияти бўлмаганини маълум қилган.
Мазкур ҳолат юзасидан фуқаролар “Х” ва “М”лар билан якка тартибда суҳбат ўтказилиб, профилактик ишлар амалга оширилган.
