Фарғонада ИИБ ходимини ҳақоратлаган аёлга жиноят иши очилди
У бундан олдин ҳам суд ҳукми билан жазога тортилган.
Фарғона вилояти Қувасой шаҳрида ИИБ ходимини ҳақорат қилган аёлга жиноят иши қўзғатилди. Бу ҳақда вилоят ИИБ ахборот хизмати хабар берди.
Маълум қилинишича, жорий йилнинг 16 апрель куни соат 21:00 ларда Қувасой шаҳар “Ҳ.Олимжон” МФЙ, Сарбазор кўчаси ҳудудида ИИБ профилактика инспектори Жиноят ишлари бўйича Қувасой шаҳар судининг ҳукми билан 4 йил 2 ой 8 кун озодликни чеклаш жазосига ҳукм қилинган Ю.Д. исмли аёлнинг мақсадсиз юрганлигини аниқлаб, ушбу ҳолатни белгиланган тартибда расмийлаштирмоқчи бўлган.
Ю.Д исмли аёл суднинг соат 19:00 дан 06:00 га қадар у ёки бу сабаб билан яшаш жойини тарк этмаслиги ҳақидаги талабини бузган ва профилактика инспектори ўз хизмат бурчини бажараётган вақтида унинг қонуний фаолиятига қаршилик кўрсатган. Шунингек, кўпчилик фуқаролар олдида ходимнинг шаъни ва қадр-қимматини беодоблик билан қасддан таҳқирлаган.
Мазкур ҳолат юзасидан Қувасой шаҳар прокуратураси томонидан Жиноят кодексининг 140-моддаси 3-қисми “а” банди (ҳақорат қилиш) билан жиноят иши қўзғатилган.
