Германия ва Италия компаниялари Россия газини рублда сотиб олиши мумкин
Бундан олдин ЕИ рус газини сотиб олиш бўйича махсус қўлланма тайёрлаганди.
Германия ва Италия ҳукумати ўз компанияларига рублда ҳисоб рақамлари очиш ва шу орқали газ сотиб олишга рухсат берди. Бу ҳақда Reuters агентлиги хабар берди.
Агентлик билан суҳбатда бўлган икки манбанинг сўзларига кўра, Берлин Газпромбанкка хорижий валютада пул тўлаш шарти билан ўз компанияларига рублда ҳисоб рақамлари очишга рухсат берган. Шунингдек, Италиянинг Eni компанияси ҳам Россия банкида ўз ҳисоб рақамини очган.
Бундан олдин Брюссель санкцияларни четлаб ўтмасдан рус газини сотиб олиш бўйича икки қўлланма тайёрлаганди. Аммо Европанинг айрим дипломатлари бу ҳужжатлар атайин мавҳум тузилганини ва бу орқали Россиядан газ сотиб олиш имкониятини сақлаб қолиш мақсад қилинганини таъкидлаган.
Аввалроқ Евроиттифоқ Россиядан газ сотиб олишни кескин камайтиришни кўриб чиқаётгани тўғрисида хабар берилганди.
