Саудия Арабистони янги OPEC+ келишувини ишлаб чиқмоқда
У нефть қазиб олиш ҳажмини белгилайди.
Саудия Арабистони янги OPEC+ келишуви имзолашга умид билдирмоқда. Бу ҳақда мамлакат энергетика вазири Абдулазиз бин Салмон ал-Сауд маълум қилди.
Вазир Financial Times нашрига берган интервьюсида юқоридаги режаларни очиқлаган. Шу билан бирга у агар талаб катта бўлса, нефть қазиб олиш кўпайтирилишини айтган.
Абдулазиз ибн Салмон ушбу келишувга Россия ҳам жалб қилинишини инкор қилмаган. Шунингдек, у дунёда нима учун “қора олтин” нархи ошиб кетганини изоҳлаган.
“сўнгги 3 йилда бутун дунё 4 миллион баррель нефтни қайта ишлаш қувватларини йўқотди, уларнинг 2.7 миллиони эса коронавирус пандемияси бошланганидан буён йўқотилди”, – деган у.
OPEC+ келишувига 2017 йилда эришилган. 2020 йилда у 2022 йил охирига қадар узайтирилди. Келишув орқали нефть ишлаб чиқарувчи давлатларнинг “қора олтин” қазиб олиши учун лимит ўрнатилган. Россия-Украина можароси ортидан Вашингтон бир неча бор Саудия Арабистонига нефть қазиб олишни кўпайтиришни сўраб мурожаат қилди. Аммо Ар-Риёд OPEC+ келишувини бузмаслигини таъкидлади.
Аввалроқ Европанинг Россия нефтидан воз кечиши учун қанча маблағ зарурлиги очиқланганди.
