Тошкент вилоятида “Халқ банки”га тегишли “Дамас” автоҳалокатга учради
Суд қарорига кўра, ҳайдовчи 19 млн жаримага тортилган.
Ижтимоий тармоқда Тошкент вилояти Ўртачирчиқ туманида иккита автомобиль иштирокида йўл-транспорт ҳодисаси содир бўлгани акс этган видеолавҳа тарқалди. Ҳолат юзасида ЙҲХХ расмий маълумот берди.
Қайд этилишича, воқеа 2021 йилнинг 13 октябрь куни соат 10.30 атрофида Ўртачирчиқ тумани ҳудудидан ўтган “Авангард–Ўртасарой” автомобиль йўлининг 5-километрида юз берган. Унда ҳайдовчи Б.Т. бошқарувидаги “Дамас” ҳамда ҳайдовчи У.А. бошқарувида бўлган “Ваз-2106"” русумли автомобиллар ўзаро тўқнашиб кетган. Оқибатда йўловчи З.Э. енгил тан жароҳати олиб, шифохонага мурожаат қилган.
Мазкур ЙТҲ юзасидан туман ИИБ ЙҲХБ масъул ходимлари томонидан тўпланган ҳужжатлар 2021 йил 27 октябрь куни жиноят ишлари бўйича Ўртачирчиқ тумани суди томонидан кўриб чиқилган. Фуқаро Б.Т. Ўзбекистон Республикаси Маъмурий жавобгарлик тўғрисидаги кодекснинг 133-моддасида назарда тутилган ҳуқуқбузарликни содир этган деб топилиб, унга нисбатан БҲМнинг уч баравари миқдорида жарима жазоси белгиланган.
Шунингдек, ҳуқуқбузар Б.Т.дан “Халқ банки” Ўртачирчиқ филиали фойдасига 19 186 042 (ўн тўққиз миллион бир юз саксон олти минг қирқ икки) сўм, “Халқ банки” Ўртачирчиқ филиалидан жабрланувчи А.А.нинг фойдасига 7 773 294 (етти миллион етти юз етмиш уч минг икки юз тўқсон тўрт) сўм зарар ундирилиши белгиланган.
