Ўзбекистонда янги географик ахборот лабораторияси очилди

Тупроқшунослик ва агрокимё илмий тадқиқот институтида Бирлашган Миллатлар Ташкилотининг Озиқ-овқат ва қишлоқ хўжалиги ташкилоти (ФАО) кўмагида ташкил этилган янги географик ахборот тизимлари (ГИС) лабораториясининг очилиш маросими бўлиб ўтди. Бу ҳақда ташкилот “Замон.уз” нашрига маълумот берди.

Қайд этилишича, Янги ГИС лабораторияси энг замонавий компьютерлар, сервер (маълумотлар маркази), плоттер (тупроқ хариталарини чоп этиш қурилмаси) ва GPS билан жиҳозланган.

Очилиш маросимида мутахассислар янги лабораториянинг мақсад ва вазифалари, шунингдек, унинг ишлаш принциплари бўйича тақдимотлар ўтказишди. Илмий ходимлари энг сўнгги технологиялар асосида жиҳозланган янги лабораториянинг имкониятлари билан таништирилди.

“Геоахборот технологиялари ерларнинг деградация жараёнларини баҳолаш ва хариталаш,  тупроқлар ҳолатини таҳлил қилишнинг самарадор ва тезкор ахборот  тизимларини яратиш, тупроқ хариталаш ишларини, анъанавий хариталаш усулларини замонавий компьютерлаштириш, тадқиқ этиладиган ҳудуд тўғрисида тез ва сифатли маълумот олиш, геоахборот технологияларини қўллаган ҳолда масофадан зондлаш маълумотларига ишлов бериш орқали кўп йиллик мониторинг ишларини олиб боришга доир илмий-тадқиқотларни амалга оширишда бир қатор имкониятлар яратади ҳамда ер деградациясини бартараф етиш бўйича лойиҳаларни амалга оширишга ёрдам беради”, — деди лойиҳа миллий бошқарувчиси Муҳаммаджон Қосимов.

Таъкидланишича, ушбу лойиҳанинг амалга оширилиши БМТнинг қурғоқчилик ва чўлланишга қарши курашиш ҳамда Иқлим ўзгариши тўғрисидаги асосий конвенциясини амалга оширишга салмоқли ҳисса қўшади.