Туркия армиясининг генерали Ўзбекистонга келди

 

Туркия Жандармерияси Бош қўмондонининг биринчи ўринбосари, армия генерали А. Чардакчи бошчилигидаги делегация Ўзбекистонга ташриф буюрди. Бу ҳақда Ўзбекистон Республикаси Миллий гвардияси хабар берди.

 

Маълум қилинишича, ташриф “Янги Ўзбекистон” истироҳат боғи ҳамда Мустақиллик монументи билан танишишдан бошланган. Шундан сўнг Миллий гвардия Марказий девонида Миллий гвардия қўмондони генерал-майор Р. Джураев билан учрашув бўлиб ўтган. Суҳбат давомида томонлар ўзаро фикр алмашиб, икки томонлама ҳамкорликнинг ҳолати ҳамда яқин истиқболдаги амалий ҳамкорлик режалари муҳокама қилинган.

Музокаралар якунида томонлар Туркия Жандармерияси Бош қўмондони, армия генерали А. Четиннинг Ўзбекистонга ташрифи чоғида илгари эришилган келишувлар доирасида кадрлар тайёрлаш, қўшма амалий тадбирлар, семинар ва тренинглар ташкил этиш соҳасидаги ҳамкорликни давом эттиришга тайёр эканликларини билдирган. 

Ташриф дастурига кўра, делегация аъзолари “Темурбеклар мактаби”, Тошкент ҳарбий-академик лицейи фаолияти ва ўқув жараёни билан танишган ва шу билан бир қаторда, Миллий гвардия Тошкент шаҳри бўйича бошқармаси, Бухоро вилояти Қўриқлаш бошқармаси ҳамда Миллий гвардия Кавалерия эскадронида бўлишган.

Бундан ташқари, меҳмонлар “Минг Ўрик” археологик музейига ҳам ташриф буюриб, Ўзбекистон Давлат санъат музейи экспозициялари билан танишган. Делегация аъзоларининг ташрифи анъанавий дўстона муҳитда, ишонч ва ўзаро ҳурмат руҳида бўлиб ўтган.