Тошкент метросида вестибюлларнинг иш вақти узайтирилди
Йўловчилар бугундан бошлаб вестибюллар кечки соат 19.00 дан кейин ҳам ишлаётганини айтмоқда.
Йўловчиларга қулайлик яратиш ва хизмат кўрсатиш сифатини янада ошириш мақсадида 2022 йилнинг 1 июнь санасидан бошлаб Тошкент метросида вестибюлларнинг иш вақти узайтирилади. Бу ҳақда метрополитен матбуот хизмати хабар бермоқда.
Қайд этишилича, “Ҳамид Олимжон”, “Пушкин”, “Мирзо Улуғбек”, “Ойбек”, “Беруний”, “Абдулла Қодирий”, “Новза”, “Тошкент”, “Космонавтлар”, “Чорсу”, “Тинчлик”, “Туркистон”, “Шаҳристон”, “Бодомзор” ҳамда “Минор” метро бекатларининг 2-вестибюли (кириш ва чиқиш қисми) тонгги соат 05:00 дан кеч соат 00:00 га қадар йўловчиларга хизмат кўрсатади.
Йўловчиларнинг маълум қилишича, “Ўзбекистон” метро йўналишининг “Тошкент” бекатида 2-вестибюл бугундан бошлаб янги тартибда ишламоқда. Zamon.uz манбалари бугун, 31-май куни соат 20.30 атрофида ушбу бекатда вестибюл фаолияти давом эттирилаётганига гувоҳ бўлганини айтди.
Эслатиб ўтамиз, шу кунга қадар бекатларнинг 2-вестибюли (кириш ва чиқиш қисми) қадар тонгги соат 07:00 дан 19:00 га қадар йўловчиларга хизмат кўрсатган.
