Францияда дипломатлар иш ташламоқчи
Бу ҳукуматнинг кадрлар соҳасидаги ислоҳотидан сўнг келиб чиққан.
2 июнь куни Францияда дипломатлар иш ташлайди. Бу ташқи сиёсий идора ходимларининг ҳукуматнинг ташкилий ислоҳотларидан норозилиги ортидан юзага келган.
Ушбу ҳаракатни амалга ошириш учун француз дипломатларини бирлаштирган еттита касаба уюшмалари келишиб олган. Ҳозирга қадар Францияда ТИВ марказий аппарати ва элчихоналарга фақатгина профессионал дипломатик ходимларни тайинлаш тартиби жорий этилган эди.
Аммо эндиликда маслаҳатчилар ва элчилар алоҳида касбий мақомни йўқотади ва префектлар ҳамда молия инспекторлари каби “давлат маъмурлари” мақомига ўтказилади. Бу эса дипломатик хизматларга бошқа соҳа вакилларининг ҳам жалб этилишини назарда тутади.
“Бу профессионал карьера, бизнинг миссиямиз ва ҳукумат билан муносабатларимизни сўроқ остига олади. Дипломатик хизмат аста-секин йўқолиб боради: ўтган 30 йилда ташқи сиёсий идора штати ярмига қисқарди. Бу дипломатик механизмнинг бузилишига олиб келади”, – деган иш ташлаш ташкилотчилари.
Франциянинг Қувайт ва Озарбайжондаги элчилари бу ташаббусни қўллаб-қувватлаган.
Париж дипломатик штат бўйича дунёда АҚШ ва Хитойдан кейин учинчи ўринда туради. Ҳозирда ТИВ тизимида 14 минг ходим ишлайди.
Мамлакатда сўнгги бор дипломатлар 2003 йилда иш ташлаган эди.
