Польша-Беларусь чегарасида 100 километрдан зиёд девор қурилди
Қурилиш ишлари июнь охирида якунланади.
Польша Беларусь билан чегарада 120 километрли девор қурди. Бу ҳақда мамлакат ички ишлар вазири Мачей Вонсик расмий Twitter саҳифасида маълум қилган.
“Беларусь билан чегарада 120 км деворга эгамиз. Режалаштирганимиздек, қурилиш ишлари шу ой охирига якунланиши керак”, – деган у.
Девор қурилиши 25 январь куни бошланган. Унда 3 минг қурувчи иштирок этган. Ушбу тўсиқнинг умумий узунлиги 187 километрни ва баландлиги 5.5 метрни ташкил этиши белгиланган. Унга жами 7 миллион тонна металл ишлатилади. Девор тепаси тиканли сим билан қопланади ҳамда электрон кузатув мосламалари ўрнатилади.
2021 йилда Польша-Беларусь чегарасини ноқонуний бузиб ўтиш бўйича 41 минг уриниш қайд этилган.
Аввалроқ Украина собиқ президенти Пётр Порошенко Украина—Польша чегарасидан ўтказилмаганди.
