Жиззахда бўри болаларини ноқонуний сотмоқчи бўлган шахслар жазоланди
Вилоят экология ва атроф-муҳитни ҳимоя қилиш бошқармаси уларга қандай чора кўрилганини маълум қилди.
Ижтимоий тармоқда Жиззах вилояти Бахмал туманида бўри болачаларини ноқонуний тарзда сотаётган шаҳслар ҳақида хабар тарқалганди. Ҳолат бўйича вилоят экология ва атроф-муҳитни ҳимоя қилиш бошқармаси расмий муносабат билдирди.
Аниқланишича, Бахмал тумани “Ўсмат” ШФЙда истиқомат қилувчи Т. Х. ва “Новқа” МФЙда яшовчи Ж. М. исмли фуқаролар 3 дона бўри болаларини ушлаб, уларни сотиш мақсадида ижтимоий тармоқ саҳифаларига жойлаган.
Олиб борилган тезкор назорат рейд тадбирида фуқаро Х. Т. га тегишли автомашина юкхонасида бўлган 3 дона бўри болалари далилий ашё сифатига олинган. Ҳуқуқбузарлаарга нисбатан Маъмурий жавобгарлик тўғрисидаги кодекснинг 90-моддаси, 1-қисмига асосан базавий ҳисоблаш миқдорининг 9 баробари миқдорида, яъни 2430000 сўмдан жарима қўлланилган.
Айни вақтда бўри болалари эколоклар томонидан парвариш қилинмоқда. Об-ҳавонинг қулай бўлган вақтида бўри болалари табиат қўйнига қўйиб юборилади.
