“Тошкент” аэропорти яқинидаги автотураргоҳлар Uzbekistan Airports балансига ўтказилади
Бу Тошкент шаҳар ҳокимининг қарорида белгилаб қўйилди.
"Тошкент-2" халқаро терминали ва ички қатновлар учун мўлжалланган "Тошкент-3" терминалининг автотураргоҳлари, шунингдек, пойтахт аэропорти ҳудудига туташ жойлардаги автотураргоҳлар Uzbekistan Airports балансига ўтказилади.
Тошкент шаҳар ҳокими Жаҳонгир Ортиқхўжаевнинг 30 майдаги қарори билан амалга оширилмоқда.
Мазкур ҳудудларни компания ихтиёрига ўтказиш давлати раҳбарининг 2021 йил 30 апрелдаги "Фуқаролик авиацияси корхоналарини трансформация қилиш ва қўллаб-қувватлаш чора-тадбирлари тўғрисида"ги қарорида кўзда тутилган эди.
Шаҳар ҳокимининг қарори бу борадаги илк қадам бўлди. Кейинчалик, Давлат активларини бошқариш агентлиги томонидан автотураргоҳларни баҳолаш ва акциядорлик жамиятининг давлат улушини ошириш бўйича тегишли буйруқ қабул қилинади. Шундан сўнг тегишли тартибда ягона акциядор — Молия вазирлиги томонидан давлат компаниянинг улушини ошириш ва автотураргоҳлар қийматини устав капиталига киритиш тўғрисида қарор қабул қилинади.
Барча амалга оширилган ишлар якуни бўйича кадастр ҳужжатларини Кадастр агентлиги томонидан "Муниципал мулкларни бошқариш маркази" ДУКдан Uzbekistan Airports AЖ номига қайта расмийлаштириш амалга оширилади.
