Тошкентда мушуклар отиб ташланмоқда
Ҳолат юзасидан шаҳар ИИББ маълумот берди.
Ижтимоий тармоқда Тошкент шаҳрининг Юнусобод туманидаги Қўшчинор маҳалласида номаълум шахс мушукни отиб ташлагани ва ҳайвонларга шафқасиз муносабатда бўлаётгани ҳақида хабар тарқалди. Ҳолат юзасидан шаҳар ИИББ расмий изоҳ берди.
Маълум қилинишича, 2022 йил 2 июнь куни Юнусобод тумани ИИБга Қўшчинор маҳалласида яшовчи фуқаро М. С. дан мурожаат келиб тушган. Аёл ўз мурожаатида 27 май куни кечқурун мушугини кўчага сайр қилишга қўйиб юборганини, орадан бир ярим соат ўтиб мушуги қайтиб келганида, унинг бурун қисмида қон оқаётган яра борлигини кўрганини баён қилган. Эртаси куни эрталаб мушугини ветеринария клиникасига олиб борган. Текширув давомида шифокорлар жониворнинг жароҳат жойидан пневматик ўқни олиб ташлаган.
Ҳозирда Юнусобод тумани ИИБ ходимлари томонидан текширув ҳаракатлари олиб борилиб, ҳуқуқбузарнинг шахси аниқланмоқда.
Таъкидланишича, “Қўшчинор” маҳалласида ҳайвонларга нисбатан шунга ўхшаш бошқа ҳолатлар ҳам кузатилган. Бироқ бу бўйича ички ишлар органларига ҳеч қандай баёнот берилмаган.
