Чирчиқда 700 қути ноқонуний дори аниқланди
Фуқаро уларни 134 млн сўмга сотаётганда ушланди.
Тошкент вилояти Чирчиқ шаҳрида дори воситаларини дорихонадан ташқарида сотиш ҳолати аниқланди. Бу ҳақда Бош прокуратура ҳузуридаги Иқтисодий жиноятларга қарши курашиш депатраменти хабар берди.
Қайд этилишича, департаментнинг Чирчиқ шаҳар бўлими ДХХ ходимлари билан ҳамкорликда тезкор тадбирда ўтказган. Унда фуқаро Ш. С. дори воситаларини ноқонуний муомалага киритиш орқали даромад орттиришни кўзлаб, 100 қути “Гепарен-белмед” ва 600 қути “Клексан” номли дори воситаларини фуқаро Д. га 134,5 млн сўмга сотган вақтида ашёвий далиллар билан ушланган.
Мазкур ҳолат юзасидан Жиноят кодексининг 186-3-моддаси (дори воситаларини ёки тиббий буюмларни дорихоналардан ва уларнинг филиалларидан ташқарида реализация қилиш) билан жиноят иши қўзғатилиб, тергов ҳаракатлари ўтказилмоқда.
